dominiko (dominiko) wrote,
dominiko
dominiko

Bonaĵoj de la tekstoredaktilo: vim-7.0

Ekde jam multaj jaroj, vim fariĝis mia plej ŝatata tesktoredaktilo. vim estas plibonigita versio de la malnova tradicia Uniksa tekstoredaktilo vi. Kvankam ĝi unue frustras preskaŭ ĉiujn komencantojn pro sia laŭdire fifama komanda reĝimo, ĝi estas nekredebla potenca ilo, post kiam oni ellernas ĝin.

Laborante kiel programisto, mi uzas, kaj ĝuas ties bonaĵojn por ĉiu-taga programado. Mi ankaŭ uzas ĝin por retpoŝti kune kun la Esperantigita retpoŝtilo mutt, kaj por fakte skribi ion ajn ceteran.

Ĉar ĉi tiu blogo estas en Esperanto, mi supozas, ke iuj legantoj interesiĝas pri iloj, kiuj faciligas la redakton de teksto en Esperanto. Unu el la plej utilaj bonaĵoj de la nova versio vim-7.0, estas la literumilo, kiu emfazas misliterumojn. Kompreneble, funkcias en la Lingvo Internacia. La Esperantaj vortaroj haveblas en Unikoda UTF-8 kodoprezento, kaj en la iso-8859-3 kodpaĝo.



Por uzi ĝin, vi devas unue elŝuti, kaj instali la Esperantan vortaron:
$ cd /usr/local/share/vim/vim70/spell/
$ sudo wget http://ftp.vim.org/pub/vim/runtime/spell/eo.utf-8.spl
$ sudo wget http://ftp.vim.org/pub/vim/runtime/spell/eo.iso-8859-3.spl
Anstataŭigu la dosierujon /usr/local/share/ en la supra komando per la dosierujo, kie troveblas vim.

Poste, vi povas ŝalti la Esperantan literumilon pere de la komando: :setlocal spell spelllang=eo. Por pli da informo pri la uzado de la literumilo, legu (angllingve) «:help spell».

Ĉar mi iafoje skribas tekston ĉu en Esperanto, ĉu la angla, ĉu en la franca, mi aldonis la jenajn komandojn en mia agorda dosiero $HOME/.vimrc por facile kaj oportune baskuli inter la Esperanta, angla kaj franca literumiloj, aŭ por tute malŝalti la literumilon:
" baskulu inter lingvoj de literumilo
let g:myLang = 0
let g:myLangList = [ "nospell", "en_us", "fr", "eo" ]
function! MySpellLang()

let g:myLang = g:myLang + 1
if g:myLang >= len(g:myLangList) | let g:myLang = 0 | endif

if g:myLang == 0 | set nospell                    | endif
if g:myLang == 1 | setlocal spell spelllang=en_us | endif
if g:myLang == 2 | setlocal spell spelllang=fr    | endif
if g:myLang == 3 | setlocal spell spelllang=eo    | endif

echo "language:" g:myLangList[g:myLang]
endf

 map <F7>      :call MySpellLang()<CR>
imap <F7> <C-o>:call MySpellLang()<CR>
Per tiuj agordoj, mi nur bezonas premi la klavon <F7> por tuj baskuli inter la diversaj lingvoj de la literumilo.

Bedaŭrinde, ial la literumilo ne komprenas la ĉapelajn literojn en mia komputilo. Kvankam mi uzas Unikodon (UTF-8), kaj la vortaro estas supozeble ankaŭ Unikoda, la literumilo emfazas ĉiujn vortojn, kiuj enhavas ĉapelajn literojn. Sed tion mi provos ripari.

Mi ankaŭ ŝatus trovi vortaron por vim, kiu ebligas literumi uzante la x-sistemon anstataŭ Unikodo, ĉar mi iafoje uzas Unikodon, kaj aliafoje uzas la x-sistemon (por retpoŝtoj). Sed tian vortaron mi ne jam trovis.

Ĝisdatigo: leginte la helpan sekcion de vim-7.0 «:help spell-mkspell», kiu priskribas, kiel krei taŭgan vortaron por vim, mi ĵus kreis mian Unikodan vortaron el la Esperanta vortaro de OpenOffice. Nun bonege funkcias kun ĉapelaj literoj. Se iu interesiĝas, jen mia funkcianta vortaro eo.utf-8.spl.

Ĝisdatigo: bertilow aldonis en komento, ke eblas kopii privatan vortaron en la pli taŭga dosierujo ~/.vim/spell/ anstataŭ /usr/local/share/vim/vim70/spell/. Informinte la verkinton de vim pri la fuŝa Esperanta vortaro, mi ricevis retpoŝton de Bram, kiu ĵus ĝisdatigis la defaŭltan Esperantan vortaron de vim.
Tags: vim
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 8 comments